សណ្ឋាគារ កាស៊ីណូ រ៉េដឡានធើន នៅក្រុងព្រះសីហនុ ត្រូវបានផ្អាកនិងដាក់ជាមណ្ឌលចត្តាឡីស័ករយៈពេល ១៤ថ្ងៃ ក្រោយមានបុគ្គលិកឆ្លងកូវីដ ១៩

(ភ្នំពេញ)៖ អាជ្ញាធរខេត្តព្រះសីហនុ បានសម្រេចផ្អាកជាបណ្តោះអាសន្ននូវដំណើការសណ្ឋាគារ កាស៊ីណូ រ៉េដឡានធើន អ៊ិនធើណេសិនណល មានទីតាំងស្ថិតនៅផ្លូវឯករាជ្យ (ផ្លូវលេខ២០០) ភូមិ៤ សង្កាត់លេខ០៤ ក្រុងព្រះសីហនុ និងដាក់ជាមណ្ឌលចត្តាឡីស័ករយៈពេល ១៤ថ្ងៃ ក្រោយសង្ស័យមានបុគ្គលិកក្នុងទីតាំងនេះ ឆ្លងកូវីដ១៩ ។ នេះបើយោងតាមលិខិតផ្ញើទៅលោក HONG ZHIGANG ដែលជាម្ចាស់សណ្ឋាគារ កាស៊ីណូ រ៉េដឡានធើន នៅថ្ងៃទី៨ ខែមេសា ឆ្នាំ២០២១នេះ។

ក្នុងលិខិតនេះ បានបញ្ជាក់ថា ការផ្អាកដំណើការសណ្ឋាគារ កាស៊ីណូ រ៉េដឡានធើន អ៊ិនធើណេសិនណលនេះ បានធ្វើឡើងបន្ទាប់ពីក្រុមការងារស្រាវជ្រាវ និងតាមដានបុគ្គលសង្ស័យ ថាមានផ្ទុកវីរុសកូវីដ១៩ បានទទួលព័ត៌មានថា មានករណីសង្ស័យការឆ្លងវីរុស១៩ ដល់បុគ្គលិកសណ្ឋាគារ ហើយក្រុមឆ្លើយតបបន្ទាន់ នៃមន្ទីរសុខាភិបាលខេត្តក៏បានយកវត្ថុសំណាក ពីអ្នកសង្ស័យដើម្បីពិនិត្យរក វីរុសកូវីដ១៩ ផងដែរ។

រដ្ឋបាលខេត្ត បានបញ្ជាក់ទៀតថា ដើម្បីទប់ស្កាត់ ការរីករាលដាលជំងឺកូវីដ១៩ ចូលក្នុងសហគមន៍ តម្រូវឲ្យផ្អាកជាបណ្តោះអាសន្នការចេញ-ចូលសណ្ឋាគារ និងកាស៊ីណូនោះ។ ក្រុមការងាររដ្ឋបាលខេត្ត នឹងរៀបចំទីតាំងនេះជា មណ្ឌលចត្តាឡីស័ក ហើយក្រុមឆ្លើយតបបន្ទាន់ នៃមន្ទីរសុខាភិបាលខេត្តនឹងយកវត្ថុ សំណាកពីអ្នកស្នាក់នៅក្នុងសណ្ឋាគារ និងកាស៊ីណូនោះទាំងអស់ ដើម្បីធ្វើតេស្តរកវីរុសកូវីដ១៩ ៕